Diario de BASSMA_RAYAN, 12 jun. 18

بسمة الريان 28 سنه بشتغل في مجال البرمجة
انا اصغر كائن في البيت بفارق سن 20 سنه بيني وبين اخواتي
يعني الدلع ومحدش بيقولي لا.. او يزعلني في حاجه
اول مره قررت اخس كنت في تالته اعدادي
رحت لدكتور وزنت لقيت ان وزني كان 106 ك
طول عمري كالبوظه وبلبس لبس ناس اكبر مني
تابعت مع الدكتور ده 4 شهور لحد ما بقى وزني 86 ك
كنت رايحه اولى ثانوي
ومن ساعتها وانا بخس وبزيد وبزيد وبخس
كل مره انجاز وااااو ايه ده خسيتي جامد وبعدها اتخن تاني
كل مره اخس 20 او 30 ك وارجع اتخن تاني اكتر من الاول
طبعا مافيش لبس على مقاسي.. فإطريت اني البس اسدال
لبسته من 2006 لحد 2015 ايوه على شان ما اروحش محل والبياع يبصلي ويقولي لا معندناش مقاسك
لحد ما قررت اسيب موال الدكاتره واتابع مع مدربين
تابعت مع كابتن اول مره 2015 .... دايت ورياضة
على النظام المتوازن... ربنا يباركله فهمني كتير عن جسمي وعرفت يعني ايه اخس واكل واشبع في نفس الوقت
طبعا خسيت وغيرت الاسدال وكنت فرحانه جدااا
لكن في مشكله بعد اول 15 ك خلاص السوائل اللي في جسمك نزلت باقي الدهون ومعاناة الدهون
فثبت عند 135 سنتين وانا ثابته.. اللخبط طيب واخد فري
الاقي وزني بقى 137 طيب ارجع اعمل دايت انزل لل 135 واثبت... اعمل رياضه مافيش فايده بنزل بالجرامات
ومجرد اخد فري ولو حاجه بسيطه ازييد اقل حاجه 2ك
وبالتالي كان صعب اكمل... صعب فعلا اني استمر مع الاحباط ده... باكل سعرات ممكن توصل ل 500 كالوري في اليوم
وساعات 1200 كالوري برضو ثابت.. رحت لدكتور
ماجد زتون بتاع قناة الحياه... ولا اي فايده
طيب نصايح سالي فؤال.. طيب الزبادي بالليمون طيب اي حاجه تنجدني... تابعت مع سفاح الفات على الفيس
مافيش فايده اسبوع كامل التزام واخس 200جم
حاجه محبطه جداااااا
لحد ما اتعرفت على الكيتو جانيك بصراحه كنت مش مقتنعه اوي
واول ما شفت الدايت والدهون سألت نفسي... هو انا هاكل ده وهخس؟ ؟ معقولة؟؟
بس اليأس اللي كنت فيه لمدة سنتين كان كافي اني اجرب اي حاجه في الدنيا... تابعت مع نفسي من شهر 4 اللي فات
نزلت من 135 ل 120 في شهرين... لقيت ان مافيش جوع
شاهيتي قلت جدااااااا... نشاط وصحه وتركيز واداء عالي جداااا....معدتي مستريحه مووووت مافيش كلاكيع وعك النشويات.. ولا الطاقة عديمة الفايدة اللي بناخدها منها
ولا كل لما اشوف حاجه اضعف قدامها... واقول ايييوه نفسي في دي.. طيب اكل دي وهبدأ من السبت ولا البرشام اللي كنت باخده على شان اقفل الشاهيه فاتارم وتربو سليم
واللي اكتشفت انه ببجيب سكته قلبيه وجلطات واتمنع من السوق مع الكيتو مافيش شهية أصلا للأكل
انتي بتنقطع عندك شهيتك للحلويات... مش عايزاها اصلا
ولا عايزه فري... حاله جسدية ونفسية مختلفة تماما
انا كان مستحيل امشي... بقى عندي طاقه جامده جداااا
كنت بنام كتييير... حاليا الحمد لله 7 ساعات مظبوطين
تابعت من 10 ايام مع تيم للكيتو كلاسيك وبلعب رياضة بالاوزان نزلت الحمد لله ل 117.. اول مره اوصل للوزن ده من ايام الجامعه... والحمد لله مستمرة
في ناس ماشافونيش من سنين بيشوفوني مش بيعرفوني
لأن شكلي ولبسي اتغير خالص... الحمد لله على نعمة الكيتو
ممكن لو عرفته من زمان كان حالي بقى افضل من كدا
ان شاء الله مكمله لحد ما اوصل للشكل اللي يرضيني